واشنگٹن ۔ وائٹ ہاؤس روس میں طاعون کے ایک مشتبہ کیس کی رپورٹوں کی نگرانی کر رہا ہے۔ انتظامیہ کے ایک عہدیدار نے ایکسیوس کو بتایا کہ ٹرمپ انتظامیہ صورتحال سے آگاہ ہے، اس کی نگرانی کر رہی ہے اور اختیارات کا جائزہ لے رہی ہے۔
متوفی کارکن کی شناخت 28 سالہ داریہ شپیلووا کے طور پر ہوئی ہے جو روس کے ارکتسک علاقے میں واقع ارکتسک اینٹی پلیگ ریسرچ انسٹیٹیوٹ میں کام کرتی تھیں۔ ایکسیوس اور لندن کے ٹائمز کے حوالے سے مقامی میڈیا کی رپورٹوں کے مطابق انھوں نے 25 ستمبر کو نمونے جمع کرتے وقت طاعون کا بیکٹیریا والی ٹیسٹ ٹیوب توڑ دی تھی۔ روسی صحت حکام نے اس بیان کی تصدیق نہیں کی۔
رپورٹوں کے مطابق وہ دو دن بعد بیمار ہوئیں، 29 ستمبر کو شدید نمونیا کے ساتھ شیلخوف کے اسپتال میں داخل کی گئیں، وینٹی لیٹر پر رکھا گیا اور یکم سے 2 اکتوبر کی درمیانی شب انتقال کر گئیں۔
روسی حکام نے پورے اسپتال کو قرنطینہ میں رکھ دیا ہے اور شپیلووا سے رابطہ رکھنے والے تقریبا 200 افراد کو طبی نگرانی میں رکھا گیا ہے۔ علاقائی گورنر ایگور کوبزیو نے بیماری کو صرف خطرناک متعدی بیماری قرار دیا اور علاقے میں تمام عوامی تقریبات منسوخ کر دیں۔ انھوں نے کہا کہ تمام شناخت شدہ رابطوں کو طبی نگرانی میں رکھا گیا ہے اور اب تک ان میں بیماری کی کوئی علامت نہیں اور ان کے لیبارٹری ٹیسٹ منفی آئے ہیں۔
پڑوسی جمہوریہ بریاتیا کے سربراہ الیکسی سیدنوف نے کہا کہ خاتون کی موت ممکنہ طور پر طاعون سے ہوئی لیکن ان کے علاقے میں طاعون کا کوئی پھیلاؤ نہیں۔ کریملن کے ترجمان دمتری پیسکوف نے روسیوں سے طاعون کے پھیلاؤ کی افواہوں پر توجہ نہ دینے کی اپیل کی۔
طاعون یرسینیا پیسٹس نامی بیکٹیریا سے ہوتا ہے۔ روسی صحت حکام نے سرکاری طور پر اس کیس کو صرف نامعلوم وجوہ کے نمونیا کے طور پر تشخیص کیا ہے اور ابھی تک کسی پھیلاؤ کی تصدیق نہیں ہوئی اور بڑے پیمانے پر منتقلی کا کوئی ثبوت نہیں۔
