جمعرات کو امریکی وزیر دفاع پیٹ ہیگستھ نے اسی فوجی سنتری کو تمغہ دیا ہے جس نے وٹرنز ڈے کے روز آرلنگٹن میں انہیں اور ان کے گروپ کو خاموشی اور احترام کی یاد دہانی کرائی تھی۔ ہیگستھ نے پینٹاگون میں آرمی اسپیشلسٹ تھامس ایگلیسیاس کی یونٹ، تیسری امریکی انفنٹری رجمنٹ کے ارکان کی میزبانی کی اور خود ایگلیسیاس کے سینے پر جوائنٹ سروس کمنڈیشن میڈل لگایا۔ یہ رجمنٹ اولڈ گارڈ کے نام سے جانی جاتی ہے، یہ امریکی فوج کی وہ رسمی رجمنٹ ہے جو نامعلوم سپاہی کے مزار کی حفاظت کرتی ہے۔ جوائنٹ سروس کمنڈیشن میڈل مشترکہ خدمات کا ایک تعریفی تمغہ ہے جو مختلف فوجی خدمات میں فرائض کی اچھی انجام دہی پر دیا جاتا ہے۔
پینٹاگون کے ایک عہدیدار نے کہا کہ یہ تمغہ گیارہ نومبر دو ہزار چھبیس کو نامعلوم سپاہی کے مزار پر ان کے فرائض کی انجام دہی پر دیا گیا ہے۔ ہیگستھ نے اس لمحے کی تصویر سوشل میڈیا پر شیئر کرتے ہوئے لکھا: ہم سپاہیوں سے محبت کرتے ہیں، ہم معیار سے محبت کرتے ہیں۔ شاباش، اسپیشلسٹ۔ آگے بڑھو، محب وطنو۔
واقعہ گیارہ نومبر بروز بدھ کو پیش آیا تھا، جب وٹرنز ڈے کی تقریب کے بعد ہیگستھ اپنی اہلیہ جینیفر ہیگستھ اور اپنے سینئر مشیروں کے ساتھ مزار کے سامنے تصاویر بنوا رہے تھے۔ سی این این کے مطابق تصاویر کے بعد گروپ کے کچھ افراد ہنستے اور باتیں کرتے ہوئے وہاں سے روانہ ہوئے۔ اسی دوران گشت پر موجود سنتری رک گیا، گروپ کی طرف رخ کیا اور چوک کے پار سے آواز لگائی: تمام زائرین ہر وقت خاموشی اور احترام کا ماحول برقرار رکھیں گے۔ اس کے بعد گروپ آگے بڑھ گیا اور سنتری نے اپنا گشت دوبارہ شروع کر دیا۔ یہ لمحہ سی این این کے کیمرے میں ریکارڈ ہوا اور بدھ کی سہ پہر نشر کیا گیا۔
یہ واضح کرنا ضروری ہے کہ وٹرنز ڈے کی فوٹیج سے یہ ثابت نہیں ہوتا کہ کون ہنسا تھا یا خود ہیگستھ نے کوئی آواز نکالی تھی یا نہیں۔ پینٹاگون کے ترجمان شان پارنیل پہلے ہی کہہ چکے ہیں کہ سپاہی نے درست اور احترام کے ساتھ سب کو وقار برقرار رکھنے کی یاد دہانی کرائی تھی۔ اس پس منظر میں جمعرات کو دیا جانے والا تمغہ اسی سپاہی کے عمل کی سرکاری سطح پر قدر دانی کے طور پر دیکھا جا رہا ہے۔
نامعلوم سپاہی کا مزار امریکا کی مقدس ترین جنگی یادگاروں میں سے ایک ہے۔ یہاں پہلی جنگ عظیم میں شہید ہونے والا ایک نامعلوم امریکی سپاہی دفن ہے اور اولڈ گارڈ کے سپاہی انیس سو اڑتالیس سے ہر موسم میں، دن رات اس مزار پر پہرہ دے رہے ہیں۔ زائرین سے توقع کی جاتی ہے کہ سنتری کے گشت کے دوران چوک میں مکمل خاموشی برقرار رکھیں۔
آرلنگٹن کی وٹرنز ڈے تقریب میں صدر ڈونلڈ ٹرمپ اور نائب صدر جے ڈی وینس بھی شریک تھے۔ سی این این کے مطابق اس نے واقعے پر پینٹاگون سے تبصرہ مانگا تھا۔ واقعے کی ویڈیو اور انگریزی تفصیل ہماری اس خبر میں دیکھی جا سکتی ہے: Tomb Sentinel Calls Hegseth Group to Silence at Arlington
