منیاپولس ۔ جنوری میں منیاپولس میں ملک بدری کی کارروائیوں کے دوران ہلاک ہونے والی رینی گڈ کے اہل خانہ نے جمعرات کو صدر ڈونلڈ ٹرمپ کی انتظامیہ پر مقدمہ دائر کر دیا۔ ان کا کہنا ہے کہ ان کی ہلاکت کا کوئی جوابدہ نہیں ٹھہرایا گیا۔
37 سالہ گڈ کو 7 جنوری کو امریکی امیگریشن اینڈ کسٹمز انفورسمنٹ کے ایک ایجنٹ نے ان کی گاڑی میں گولی مار کر ہلاک کر دیا تھا۔ وہ اپنی اہلیہ کے ساتھ ان مظاہروں میں شریک تھیں جو مینیسوٹا میں تارکین وطن کی گرفتاری کے لیے تعینات نقاب پوش اور مسلح وفاقی ایجنٹوں کے خلاف روزانہ ہوتے تھے۔ دو مقدمات میں گولی چلانے والے آئی سی ایجنٹ جوناتھن راس اور کئی اعلیٰ حکام جن میں اسٹیفن ملر اور کرسٹی نوم شامل ہیں، پر شہری حقوق میں مداخلت کی سازش، غیر آئینی غفلت اور ضرورت سے زائد طاقت کے استعمال کا الزام ہے۔ اہل خانہ جیوری ٹرائل اور ہرجانے کا مطالبہ کر رہے ہیں۔
گڈ کے بھائی بریٹ گینگر نے منیاپولس میں پریس کانفرنس میں کہا کہ رینی کے ساتھ جو ہوا وہ مکمل بے معنی تھا اور یہ حیران کن ہے کہ کوئی جوابدہی نہیں، کوئی تحقیقات نہیں، کوئی تعزیت نہیں اور پالیسی میں کوئی تبدیلی نہیں۔ انھوں نے کہا کہ امریکہ کو کیا ہو گیا ہے، اب کچھ بدلنا چاہیے۔
گڈ کی ساتھی بیکا گڈ نے کہا کہ میں آج یہاں اس لیے ہوں کیونکہ پچھلے جنوری میں پوری دنیا نے دیکھا کہ ہماری پوری کائنات تباہ ہو گئی۔ اہل خانہ کے وکیل انتونیو رومانوچی نے حکومت کو اپنے ہی شہریوں کے لیے سنگین اور مہلک خطرہ قرار دیا۔
انتظامیہ کا موقف ہے کہ راس نے اپنے دفاع میں گولی چلائی۔ وائٹ ہاؤس کی ترجمان لارین بس نے مقدمات کو بے بنیاد قرار دیا اور کہا کہ حکومت ان دیوانی مقدمات کا بھرپور دفاع کرے گی۔ محکمہ انصاف نے جنوری میں کہا تھا کہ گڈ کی موت میں وفاقی شہری حقوق کی تحقیقات کی کوئی بنیاد نہیں۔
گڈ کی ہلاکت نے ان کارروائیوں کے خلاف ردعمل تیز کر دیا جن میں ہزاروں امیگریشن ایجنٹ مینیسوٹا کی سڑکوں پر تعینات تھے۔ گڈ کی موت کے دو ہفتے بعد امیگریشن ایجنٹوں نے امریکی محکمہ ویٹرنز افیئرز کے نرس ایلکس پریٹی کو بھی گولی مار کر ہلاک کر دیا۔ ٹرمپ نے فروری میں مینیسوٹا میں یہ کارروائی ختم کر دی۔ اب تک ملوث کسی ایجنٹ پر کوئی الزام عائد نہیں ہوا۔
